December 17, 2008
ဇော်မင်း
၂ဝဝ၆ ခုနှစ်နဲ့ ၂ဝဝ၇ ခုနှစ် ကာလအတွင်း စာရင်းဇယားများအရ အိန္ဒိယနိုင်ငံမှာ ကိုယ့်ကိုယ်ကို သတ်သေခဲ့တဲ့ လယ်သမား ပေါင်း ၁၆,၆၃၂ (တသောင်းခြောက်ထောင် ခြောက်ရာသုံးဆယ့်နှစ်) ယောက် ရှိခဲ့သည်။ ထိုသတင်းကို အိန္ဒိယနိုင်ငံမှ နာမည် ကြီး The Hindu သတင်းစာက ဒီဇင်ဘာလ ၁၂ရက်နေ့တွင် ရေးသားခဲ့၍ သိရှိရသည်။
ထိုကဲ့သို့ မိမိကိုယ်ကိုယ်ကို သတ်သေခဲ့သော လယ်သမား အများစုသည် ပြည်နယ်ငါးခုက ဖြစ်ကြောင်းလည်း ဖော်ပြထားသည်။ အဆိုပါ ပြည်နယ်တွေကတော့ မဟာရပ်ရ်ှထရ၊ အန်ဒရာ ပရာဒက်ရှ်၊ ကာနာတာကား၊ မဒရာ ပရာဒက်ရ်ှနဲ့ ချက်တီးစ်ဂါး ပြည် နယ်တွေ ဖြစ်ကြသည်။ မိမိကိုယ်ကို သတ်သေခဲ့သူများရဲ့ သုံးပုံနှစ်ပုံသော လူဦးရေဟာ အဲသည့် ပြည်နယ်များက ဖြစ်ကြောင်း တွေ့ရှိရသည်။
မဟာရပ်ရ်ှထရ ပြည်နယ်ကတော့ ၂ဝဝ၆နှင့် ၂ဝဝ၇ အတွင်း သတ်သေသူဦးရေ ၄,ဝဝဝ (လေးထောင်) ကျော် ရှိတာမို့ အများ ဆုံးဟု ဆိုနိုင်သည်။၂ဝဝ၅ ခုနှစ်နဲ့ ၂ဝဝ၆ ခုနှစ် အတွင်းက မိမိကိုယ်ကို သတ်သေခဲ့တဲ့ လယ်သမားပေါင်းဟာ အိန္ဒိယနိုင်ငံမှာ ၁၇,ဝ၆ဝ (တသောင်း ခွန်နှစ်ထောင်နဲ့ခြောက်ဆယ်) ရှိခဲ့တာမို့ ၂ဝဝ၇ မှာနဲ့စာရင် သတ်သေသူ လယ်သမားဦးရေ အနည်းငယ် လျော့ကျသွားသည်ဟု ပြောနိုင်သည်။
၁၉၉၇ ကနေ ၂ဝဝ၇ ဆယ်နှစ်တာ ကာလအတွင်း အိန္ဒိယနိုင်ငံမှာ ကိုယ့်ကိုယ်ကို သတ်သေခဲ့တဲ့ လယ်သမားဦးရေ စုစုပေါင်း ဟာ ၁၈၂,၉၃၆ (တသိန်းရှစ်သောင်း နှစ်ထောင်ကိုးရာ သုံးဆယ့်ခြောက်) ယောက် ရှိခဲ့ကြောင်း သည် ဟင်ဒူ သတင်းစာက ထပ်မံဖေါ်ပြထားခဲ့သည်။
အိန္ဒိယအစိုးရဟာ လယ်သမားတွေကို တတ်နိုင်သလောက် တဖက်မှာ ကူညီနေသော်ငြားလည်း လုံလောက်အောင် မကူညီ နိုင်လို့ ဒီလိုအဖြစ်မျိုးတွေကို တွေ့နေရတယ်ဟု သုံးသပ်ကြသည်။ ၂ဝဝ၆ တနှစ်အတွင်း မှာ အစိုးရက လယ်သမား တွေကို ကူညီဖို့ ရူပီးငွေပေါင်း ကုဋေ ၅,ဝဝဝ သုံးစွဲခဲ့သည်။ သို့သော် အိန္ဒိယနိုင်ငံသည် ကျယ်ပြောသလောက် မြေယာကို မှီခို လုပ် ကိုင်တဲ့ လယ်သမားများလွန်းတဲ့ အတွက် အားလုံးကို ကာမိစေရန် မတတ် နိုင်ခဲ့။ ထို့အပြင် ကုမ္ပဏီကြီးများ၏ အမြတ်ကိုသာ ကြည့်ပြီး လက်လွတ်စပယ်လုပ်သည့် လုပ်ရပ်များကြောင့် လယ်သမားသတ်သေနှုန်း ဤမျှများပြားရကြောင်း သိရှိရသည်။
ဥပမာအားဖြင့် ဆိုရပါက ကုမ္ပဏီကြီးများက သူတို့အမြတ်ရနိုင်မည့် သီးနှံကို လယ်သမားများအား စိုက်ခိုင်းသည်။ ထို့အတွက် လယ်သမားများ လိုအပ်သော ထွန်စက်၊ မျိုးစေ့၊ ဓာတ်မြေသြဇာနှင့် အခြားကုန်ကျစရိတ်များ အတွက် ငွေထုတ်ချေးသည်။ သို့သော် ဈေးချိုချိုနှင့် ပေးသည်တော့မဟုတ်။ တကယ်တန်း သီးနှံထွက်ရှိလာသောအခါ ထင်သလို ဈေးကမရသော အခါများ တွင် လယ်သမားများ အကြွေးတင်ကြတော့သည်။ မြတ်သည့်နှစ်များလည်း ရှိသည်။ မြတ်သူများလည်းရှိသည်။ အရင်းလောက် ပဲ ပြန်ရသူများလည်း ရှိသည်။ အထွက်ကောင်းသော်လည်း နိုင်ငံတကာ ဈေးကွက်တွင် သီးနှံဈေးကောင်းမရသည့် နှစ်များ လည်း ရှိသေးသည်။ မိုးခေါင်၍ ရေကြီး၍ အထွက်နှုန်း ကျဆင်းတာမျိုးလဲ ရှိသေးသည်။ ဒီကြားထဲ ယူထားသော ငွေများအတွက် အတိုးကလည်း တဖက်မှာ ပိလာသည်။ နောက်ဆုံးတွင် တင်ရှိလာသော အကြွေးများကို ပြန်ဆပ်ရန် ခက်ခဲလာတော့၏။ ထိုအချိန်မျိုးတွင် ကိုယ့်ကိုယ်ကို သတ်သေသူ လယ်သမားများ ပေါ်ပေါက်လာရခြင်း ဖြစ်သည်။ အိန္ဒိယလယ်သမားတွေ စိတ် ဓာတ်ပြင်းထန်လို့ သတ်သေကြသည်လား (သို့) စိတ်ဓာတ်ပျော့ကြလို့ သတ်သေကြတာလား ဆိုတာတော့ မပြောတတ်။
ကုမ္ပဏီကြီးများ ဤလမ်းစဉ်ကိုသုံး၍ လယ်သမားများကို သူတို့လိုသည့် သီးနှံကိုသာ စိုက်ခိုင်းခြင်းသည် ဥပဒေကြောင်းအရ လုပ်ခြင်တိုင်း လုပ်ခွင့်မရှိပေ။ သို့သော် ပြည်နယ်အတွင်းရှိ အာဏာပိုင် များကလည်း ကုမ္ပဏီကြီးများထံမှ လာဘ်ငွေများ ယူထားသောကြောင့် ဖြစ်ပျက်နေသည်များကို မျက်နှာလွှဲထားသည်။ ဒီမိုကရေစီရှိသော လွတ်လပ်သော နိုင်ငံဖြစ်သော် လည်း ငွေကြေးခြစားမှု ကြီးမားလွန်းခြင်းသည် ဖွံ့ဖြိုးတိုးတက်မှုကို အဟန့်အတား ဖြစ်စေသည်။ လူဆင်းရဲတို့ကို ပိုလို့ ဆင်းရဲ စေ သည်။
ဒီမိုကရေစီလည်းမဲ့၊ လွတ်လပ်မှုလည်းမရှိ၊ အကူအညီလည်းမရ၊ လာဘ်စားတာကလည်း နေရာတိုင်း၊ အုပ်စိုးသူ အဆင့်ဆင့် ကိုလည်း ကြောက်နေရသော မြန်မာပြည်လိုမျိုးမှာတော့ လယ်သမားများ ခွေးလှေးကြမ်းပိုး အဆင့်သို့ ရောက်ကြရသည်မှာ မဆန်း။
အိန္ဒိယဗဟိုအစိုးရက ၂ဝဝ၆ ခုနှစ်အတွင်း လယ်ယာ စိုက်ပျိုးရေးကဏ္ဍ အတွက် ရူပီးငွေ ကုဋေပေါင်း ၅,ဝဝဝ ကူညီခဲ့သည်။ မြန်မာစစ်အစိုးရက မြန်မာ့လယ်ယာ စိုက်ပျိုးရေးဏ္ဍအတွက် ၂ဝဝ၆ နှင့်၂ဝဝ၇ အတွင်း ဘယ်ရွေ့ဘယ်မျှ ကူညီပံ့ပိုးပေးခဲ့ သည် ကို မည်သူများ ကြားဖူးပါသနည်း။ နိုင်းယှဉ်ကြည့်နိုင် စေရန်ဖြစ်သည်။
ပြောပါဦးမည်။ တနေ့က မြန်မာပြည်မှ လယ်သူမကလေး တဦးကို သတင်းကုန်ကြမ်းအတွက် အင်တာဗျူးခဲ့သည်။ ထိုမိန်းကလေးသည် အသက်နှစ်ဆယ်သာ ရှိသေးသည်။ ထိုင်းနိုင်ငံတွင် ကလေးထိန်းထမင်းချက် အဖြစ်လာရောက်၍ လုပ်ကိုင်နေခြင်းဖြစ်သည်။ သူမမိဘများသည် သထုံနယ်ထဲကဖြစ်၍ လယ်ပိုင်များဖြစ်သည်။ လယ်လေးငါးဧက ပိုင်သော အသေးစားလယ်သမားများ ဖြစ်သည်။ ကိုယ်ပိုင်လယ် ရှိသားနဲ့ ဘာကြောင့် ထိုင်းနိုင်ငံမှာ လာလုပ်နေတာ လည်းဟု မေးမြန်း မိသည်။
လယ်လုပ်ငန်းက အမြတ်မရှိတာ ကြာပါပြီဟုဆိုသည်။ အကြွေးမတင်ဘဲ စားလောက်ရုံ အခြေအနေ ရှိသည်ဆိုလျှင်ပင် သူတို့ အနေနှင့် ထိုင်းနိုင်ငံလာ၍ အလုပ်လုပ်စရာ မလိုပါဟု ဖြေသည်။ လယ်က လုပ်ရင်းလုပ်ရင်း ရှုံးနေသည်ဟု ဆိုသည်။ ဘယ် ကမှလည်း အကူအညီမရရှိပါတဲ့။ တင်လာသည့် အကြွေးများကို ပြန်လည်ဆပ်နိုင်ရန် တခုတည်းသော နည်းလမ်း ကတော့ ထိုင်းနိုင်ငံကို လာ၍အလုပ်လုပ်ခြင်းသာ ဖြစ်ကြောင်း သိရသည်။ ထို့ကြောင့် သူတို့ ညီအမနှစ်ယောက် မိဘ နှစ်ပါးနှင့် လူမမယ် မောင်လေးများကို ရွာတွင် ထားရစ်ခဲ့၍ သူတပါးနိုင်ငံတွင် ကျွန်လာခံနေရခြင်း ဖြစ်သည်။
မြန်မာပြည်တွင် လယ်လုပ်တုံးက နေ့စဉ်ဝင်ငွေသည် ကျပ်နှစ်ထောင်ခန့်သာရှိသည်ဟု ဆိုသည်။ ဤသို့ဆို၍ တလကို လယ် သူမတဦး အနေဖြင့် ကျပ်ခြောက်သောင်း ဝင်သည်ဟု တွက်၍မရဟုလည်း ရှင်းပြသည်။ အချို့လများတွင် တလလုံးဝင်ငွေသည် ငါးသောင်းအောက်မှာ ဖြစ်နေတတ်သည်ကိုလည်း ရင်ဆိုင်ကြရသည်။ အခုထိုင်းနိုင်ငံတွင် အလုပ်လုပ်၍ ရသော ဝင်ငွေသည် မြန်မာပြည်နှင့် နှိုင်းစာပါက ပို၍များသလို လစဉ်ဘယ်လောက် ဝင်သည်ဆိုသည်ကို ဘိုင်သေထား၍ တွက်လို့ရသည်ဟု ဆို သည်။ ကလေးထိန်း ထမင်းချက်အလုပ်ဟု ဆိုသော်လည်း ထိုမိန်းကလေး၏ တလဝင်ငွေသည် မြန်မာကျပ်ငွေဖြင့် တွက်မည် ဆိုပါက တလတွင် ကျပ်နှစ်သိန်းခန့် ရှိနေသည်။ ထို့ကြောင့် မြန်မာပြည်တွင် လယ်လုပ်ခြင်းထက် ပို၍အဆင်ပြေသည်ဟု ရှင်းပြလေသည်။
အဆိုပါ လယ်သူမကလေး၏ မိဘများသည် လယ်ပိုင်များဖြစ်သည်။ သူတို့တောင်မှ အကျပ်အတည်း ကြီးသောကြောင့် ထိုင်း နိုင်ငံတွင် အလုပ်လာလုပ်နေရသည်။ လယ်တကွက်မှ မပိုင်သော စာရင်းငှားများ အတွက်ကတော့ စဉ်းစားစရာ တောင် မလိုတော့။
ဤတွင် တချက်စဉ်းစား မိသည်ကတော့ မြန်မာပြည်မှာကော လယ်သမားများ ကိုယ့်ကိုယ်ကို သတ်သေတာမျိုး ရှိနိုင်သလား ဆိုသည့် အချက်ပင်ဖြစ်သည်။ ရှိနိုင်သည်။ အိန္ဒိယလောက် မများလျှင်သာနေမည်။ သို့သော် သတင်း မှောင်ချထားသော နိုင်ငံ တွင် ဘယ်သူတွေ ဘာဖြစ်နေသည်ကို ဘယ်လိုလုပ်၍ အတိအကျ သိနိုင်မည်နည်း။ အိန္ဒိယ မှာက ဒီမိုကရေစီရှိ၍ သတင်းလွတ် လပ်သော နိုင်ငံဖြစ်၍ သတင်းစာများက အခုလို အတိအကျ ပွင့်ပွင့်လင်းလင်း ရေးသားတင်ပြ နိုင်ခြင်းဖြစ်သည်။ အဆိုးထဲက အကောင်းရှိနေသေးသည်။
မြန်မာပြည် ဆိုတာကလည်း အခုအထိ လယ်ယာမြေကို အမှီပြု၍ အသက်မွေးနေရသည့် လူဦးရေက အများစု ဖြစ်နေ သေး သည်။ လယ်သမား လူတန်းစားတို့ ပိုလို့ဆင်းရဲ လာကြသည် ဆိုတာကတော့ မကြားခြင်မှအဆုံး။ သို့သော် ပွင့်လင်းသော စနစ်မရှိသောကြောင့် ဘာကြောင့်ဆင်းရဲသည်။ ဈေးကွက်အတွင်း ဘယ်လို ရင်ဆိုင်နေရသည်။ သူတို့ကို ဘယ်လိုအကူ အညီ မျိုးပေးနေသည် စသဖြင့် ဘာတခုမှ မကြားရပါ။
ပွင့်လင်းမှုမရှိသော စနစ်အောက်တွင် ပိတ်ဆို့နေသော ထုထည်သည် ကြီးလှသောကြောင့် အလင်းတစကိုပင် မြင်ရန် ခက်ခဲ လှသည်။
ဇော်မင်း (လူ့ဘောင်သစ်)
၁၇ ရက် ဒီဇင်ဘာလ ၂ဝဝ၈ ခုနှစ်
No comments :
Post a Comment