လူထုနဲ့ တသားတည်းဆိုတဲ့ လမ်းပြကြယ်အဖွဲ့က ဦးအေးမြင့်

မိုးမခ
မေ ၂၃၊ ၂၀၁၀

ဧပြီလလည် မြန်မာနှစ်ဆန်းအပြီးကတည်းက ပဲခူးနယ်တ၀ှမ်းက ရေရှားပါးမှုပြဿနာများကို ပြည်ပက မြန်မာသတင်းစာမျက်နှာများနဲ့ ပြည်ပရေဒီယိုဌာနအစီအစဉ်များကတဆင့် မြန်မာတို့ ကြားသိလာကြရပါတယ်။ အဲသည်နောက် ဧပြီလကုန်မှ စတင်ပြီး ပဲခူးမြို့နယ်၊ လမ်းပြကြယ်အဖွဲ့က ဦးအေးမြင့် က ဒေသခံများ၊ စေတနာရှင်များနဲ့ လက်တွဲပြီး ရေပေးလှူခြင်းများကိ်ု ၀ိုင်းဝန်း ကူညီ ဆောင်ရွက်လာတာကို တွေ့ရပါတယ်။

မေလမှာတော့ဖြင့် နာရေးကူညီမှုအသင်း (ရန်ကုန်) ကလည်း တတပ်တအား ရေအလှူဒါနလုပ်ငန်းများမှာ ပါဝင်ဆောင်ရွက်လာပါတယ်။ ထို့အတူ အင်န်အယ်ဒီပါတီရဲ့ လူမှုအထောက်အကူလုပ်ငန်းအဖွဲ့များ၊ လူငယ်များနဲ့ အမျိုးသမီးများကလည်း ရေပေးဝေရေးအလုပ်များကို ၀ိုင်းဝန်းလျက် ရှိတာကို တွေ့ရပါတယ်။
ဒေသခံများနဲ့ အလှူရှင်တွေ၊ စေတနာရှင်တွေ၊ လုပ်အားပေးတွေနဲ့အတူ အမြဲတမ်း တက်တက်ကြွကြွတွေ့နေရတဲ့ အဖွဲ့ကတော့ ဦးအေးမြင့်နဲ့ လမ်းပြကြယ်အဖွဲ့ ဖြစ်ပါတယ်။ သတင်းမီဒီယာအဖွဲ့များက ဆက်သွယ်မေးမြန်းတိုင်းမှာလည်း ဦးအေးမြင့်တို့က အချိန်ပေးပြီး ဒေသရဲ့ အခြေအနေတွေ၊ ဆောင်ရွက်ချက်တွေကို အချိန်ယူပြီး အသေးစိတ် ရှင်းပြတဲ့အတွက် နေ့စဉ် သတင်းမီဒီယာနဲ့ ဘလောဂ့်စာမျက်နှာတွေမှာ လှုပ်ရှားမှုတွေကို တွေ့နေ၊ သိနေကြတာကို တွေ့ရပါတယ်။

ယနေ့ ဦးအေးမြင့်နဲ့ တွေ့ဆုံခိုက် ပထမဦးဆုံးမေးမိတာက ကလေးစစ်သားတွေ မိဘတွေနဲ့ ပြန်ဆုံတွေ့ကြပြီလား ဆိုတာ ဖြစ်ပါတယ်။ ဦးအေးမြင့်က ကလေးစစ်သားတွေကို မိဘတွေအိမ်ပြန်ရောက်သွားကြပြီလို့ ဖြေကြားပါတယ်။ လက်ရှိအခြေအနေနဲ့ ပတ်သက်ပြီး လက်လှမ်းမီသမျှတွေကို မေးမြန်းမိပါတယ်။

“အဓိကကတော့ အင်န်အယ်ဒီရဲ့ အခမ်းကဏ္ဍပျောက်ကွယ်သွားမှာကို စိုးရိမ်မိတယ်။ ဒါကို ပထမဦးဆုံး ပြောချင်ပါတယ်။ ကျနော့်ရင်ထဲမှာ ရှိတဲ့ စေတနာကို အရင်းခံအတိုင်းပြောရရင်တော့ အင်န်အယ်ဒီပါတီဟာ မိမိပါတီ မဟုတ်ပေမဲ့ ကျနော်တို့တတွေဟာ အင်န်အယ်ဒီနဲ့လည်း တသားတည်း ရှိနေတယ်ဆိုတာကို သိစေချင်ပါတယ်။”

အဲသည်မှာ မေးဖြစ်တာက အခုအချိန်မှာ ဒေသခံတွေနဲ့ လက်တွဲပြီး ရေရှားပါးမှုနဲ့ ရေတွင်း ရေကန်များ တူးဖော်မှုတွေ ဆောင်ရွက်နေချိန်မှာ အင်န်အယ်ဒီကလည်း အတူတကွ ဆောင်ရွက်နေကြတယ် မဟုတ်ဘူးလား ဆိုတာဖြစ်ပါတယ်။

“ဟုတ်ပါတယ်။ အနီးမှာရှိနေတဲ့ အင်န်အယ်ဒီတွေကို အမြဲရှိနေစေချင်တယ်။ ပြီးတော့လည်း ဦးဝင်းတင်တို့ ဦးတင်ဦးတို့လည်း လူထုထဲ ကိုယ်တိုင်ဆင်းပြီး ၀ိုင်းဝန်းပေးနေတာတွေကို အမြဲ မြင်တွေ့နေစေချင်ပါတယ်။”
အဲသည်မှာ ပါတီရဲ့ အခမ်းကဏ္ဍနဲ့ ပတ်သက်ပြီး ဦးအေးမြင့်ရဲ့ သဘောထားကို မေးပါတယ်။

“အခုအချိန်မှာ ပါတီဟာ အာဏာမလိုပါဘူး။ သြဇာပဲ လိုတယ်လို့ ပြောချင်ပါတယ်။ အာဏာဆိုတာ မမြဲပါဘူး။ သြဇာဆိုတာ တည်မြဲပါတယ်။ ဗိုလ်သန်းရွှေမှာ လက်နက်နဲ့ အာဏာရှိတယ်။ သို့သော် ဒေါ်အောင်ဆန်းစုကြည်ကို ကြောက်နေရတာကတော့ ဒေါ်စုရဲ့ သြဇာကြီးမားမှုကြောင့် ဖြစ်ပါတယ်။
အခုအချိန်မှာ နာမည်ကြီးဖို့၊ ကြွားဝါဖို့၊ နေရာရဖို့တွေက အရေးမကြီးဘူး။

ဒေါ်အောင်ဆန်းစုကြည်ကိုယ်တိုင်က နာမည်ကြီးဟီးရိုး လုပ်ခဲ့တာ မဟုတ်ဘူး၊ အခုအချိန်မှာ လူထုနဲ့ တသားတည်းဖြစ်အောင် လူထုထဲကို ဆင်းပြီးတော့ လူထုရဲ့ ဘ၀အခြေအနေကို အမြဲကြည့်နေလို့ရှိရင် လူထုထံက ပေးအပ်ယုံကြည်တဲ့ သြဇာကို လက်ကိုင်ရရှိမှာ ဖြစ်တယ်လို့ ပြောချင်ပါတယ်။”
အဲသည်မှာ ပြောဖြစ်တဲ့ကိစ္စကတော့ လူထုထဲကို ဆင်းတဲ့နေရာမယ် အင်န်အယ်ဒီပါတီရဲ့ လိုအပ်တဲ့ အရင်းအနှီးတွေ၊ သယံဇာတတွေက ဘာတွေ ဖြစ်မလဲ။ ဘယ်လိုမျိုး အင်အားတွေကို အထောက်အကူပြုပြီး ဆောင်ရွက်ကြရမှာလဲ ဖြစ်ပါတယ်။

“ ပထမဦးဆုံးကတော့ စိတ်ဓာတ်ပါ။ ဒေါ်အောင်ဆန်းစုကြည်ဟာ အကျယ်ချုပ်ကျနေရတာတောင် လူတွေအတွက် အမြဲ နားစွင့်နေပါတယ်။ ဒါကို အတုခိုးကြရမယ်။ နောက်ပြီးတော့ ဒီအချိန်ဟာ အခွင့်အရေးအတွက် တံခါးခေါက်တဲ့ အချိန်ဖြစ်ပါတယ်။ ပါတီဝင်တိုင်း လူထုထဲ ဆင်းကြပြီး၊ လူထုလိုအပ်ချက်တွေကို လိုက်လံဖြည့်ဆည်းကြတဲ့နေရာမှာ ငွေကြေး ဥစ္စာနဲ့ ဖြည့်မှ မဟုတ်ပါဘူး။ စေတနာတွေ လုပ်အားတွေနဲ့ လူတွေကြားထဲက လူမှုရေးဆောင်ရွက်ချက်တွေ များများလုပ်စေချင်ပါတယ်။ ပြီးတော့လည်း မီဒီယာတွေ သတင်းပြန်ကြားရေးတွေက ၀ိုင်းပြီး ထုတ်ပြန် အသိပေးနေကြရင် ရှေ့ကို တိုးလာဖို့ပဲ ရှိပါတယ်။”

လက်ရှိ အခြေအနေမှာလည်း အင်န်အယ်ဒီက လူထုကြားထဲက လိုအပ်ချက် အခက်အခဲတွေကို ၀င်ရောက်ဆောင်ရွက်နေတာကို တွေ့နေရတာပဲ ဖြစ်ပါတယ်။ သို့သော် အဲသည်မှာ ဘယ်လိုမျိုး လိုအပ်ချက်တွေ ရှိနေသေးသလဲ။ ဝေဖန်ချင်သလဲ ဆိုတာက နောက်မေးခွန်းတခု ဖြစ်ပါတယ်။
“အခု လုပ်နေတာကို ဒီထက်ပိုပြီး ပြည့်စုံစေချင်တာပါ။ တယောက်တပေါက် ကိုယ်သန်ရာ သန်ရာ လုပ်နေတာကနေ သေသေချာချာ စီမံကိန်းချပြီး လုပ်လာတာမျိုး မြင်လာချင်ပါတယ်။ ဥပမာ ဦးဝင်းတင်က တမျိုးပြော၊ ဆင်းလုပ်တဲ့ ဦးအုန်းကြိုင်က တမျိုး လုပ် ဖြစ်နေတယ် ဆိုတာမျိုး မမြင်သွားစေချင်ပါဘူး။ နောက်ပြီးတော့လည်း တပြည်လုံးအနှံ့ လျောက်လုပ်နေဖို့လည်း မဟုတ်သေးပါဘူးး
အခု လက်ရှိ အရေးပေါ်နေတဲ့ နယ်မြေတခုဆိုရင် အဲသည်နယ်မြေကို အာရုံစိုက်ပြီး အားလုံးက ပူးပေါင်းလုပ်တာ၊ စုပေါင်းတိုင်ပင်ပြီး စီမံကိန်းဆွဲပြီး လုပ်တာမျိုးတွေကို အကြံပေးလိုပါတယ်။ လူအများကြီးနဲ့လည်း လုပ်စရာမလိုပါဘူး။

အဖွဲ့အစည်းတခုအနေနဲ့ လုပ်ပြီဆိုရင်တော့ စည်းစနစ်နဲ့၊ တိုင်ပင်ပြီး လုပ်ကြရင် မိမိသဘောနဲ့ မိမိ လုပ်ကြ၊ လှူကြတာမျိုး၊ သီးခြားစီ လုပ်ကြတာမျိုး အများက မမြင်တော့ဘူးပေါ့။ သတင်းပြန့်နှံ့မှုမှာလည်း နေ့စဉ် ရက်ဆက် လုပ်ကိုင်နေတာတွေကို ကြားသိနေကြရမှာ ဖြစ်ပါတယ်။ ဥပမာဆိုရင် နာရေးကူညီမှုအသင်းကို ရေအလှူလုပ်ငန်းတွေကို ကြည့်ပါ။”

အခုလက်ရှိအခြေအနေမှာ ဒေသခံတွေနဲ့အတူ နီးနီးကပ်ကပ် ရှိနေတဲ့ ဦးအေးမြင့်တို့ လမ်းပြကြယ် အဖွဲ့သားများက အလှူရှင်များ၊ စေတနာရှင်များ၊ လုပ်အားပေးများအတွက် ကျေးရွာတွေ အရောက် လုပ်ငန်းများ အဆင်ပြေချောမွေ့အောင် ဆောင်ရွက်ပေးနေတဲ့ အကြောင်းတွေကို ဆက်လက်ပြီး မေးဖြစ်ပါသေးတယ်။

“ အခုဟာက ရေပေးဝေတဲ့ အလှူတင်မဟုတ်တော့ဘဲ၊ ရေတွင်း ရေကန်တွေ တူးဖော်ပေးရတဲ့ ရေရရှိရေး အလုပ်တွေ ဖြစ်လာပါတယ်။ အခု ခင်ဗျားတို့ဆီမှာ တင်ထားတဲ့ ဓာတ်ပုံသတင်းတွေအတိုင်း ကျေးရွာ ၈ ရွာခန့်ကို ရေရရှိရေးအတွက် ဆောင်ရွက်ပေးနိုင်ခဲ့ပါတယ်။ ကျေးရွာတရွာကို ပျမ်းမျှ လူဦးရေ ၈၀၀ ခန့် ရှိပါတယ်။

ဒါတွေက ရေရှည်အလုပ်တွေ ဖြစ်သွားပြီ။ အခု လမ်းပြကြယ်ဟာ အားလုံးအတွက် လိုက်လံဆောင်ရွက်လျက် ရှိပါတယ်။ ၀ိုင်းဝန်းလုပ်ကိုင်ကြတဲ့ နေရာမှာလည်း အင်န်အယ်ဒီပါတီဝင်တွေနဲ့ အတူ လက်တွဲပြီး လုပ်ကြတယ် ဆိုတဲ့အကြောင်းကို ပြောပြပါတယ်။ လမ်းပြကြယ်ရဲ့ ဆောင်ရွက်ချက်ဆိုတာ အင်န်အယ်ဒီရဲ့ ကိုယ်ပွားသဖွယ် ဆောင်ရွက်နေတာ ဖြစ်တယ် ဆိုတာကို သဘောပေါက်အောင်လည်း ကျေးရွာတွေမှာ ရှင်းပြသင့်တဲ့အခါ ရှင်းပြပါတယ်။

ရေသည် အသက်၊ အသက်သည် ရေ ဆိုတာကို သိကြသလိုပဲ လူထုရဲ့ အသက်ဝိဉာဏ်ဟာ အင်န်အယ်ဒီအဖြစ် တည်ရှိနေစေချင်သလို၊ အင်န်အယ်ဒီရဲ့ အသက်ဟာလည်း လူထုလက်ထဲမှာ ဖြစ်တယ် ဆိုတာကို အားလုံးကို သိသွားစေချင်ပါတယ်။”

ဦးအေးမြင့်က လက်ရှိ အခြေအနေများကို ရှင်းပြနေရင်းနဲ့ပဲ မြန်မာပြည်ရဲ့ တခုတည်းသော အတိုက်အခံပါတီ အင်န်အယ်ဒီဖက်ကို အာရုံက ရောက်ရောက်သွားပါတယ်။ အဲဒါနဲ့ပဲ လက်ရှိ အင်န်အယ်ဒီရဲ့ ၂၀၁၀ ရွေးကောက်ပွဲမှာ မှတ်ပုံမတင်ခြင်းနောက်ပိ်ုင်း အလားအလာတွေကို ထင်မြင်ချက်တောင်းမိပြန်ပါတယ်။

“အန်အယ်ဒီပါတီဟာ မတ်လ ၂၉ ဆုံးဖြတ်ချက်နဲ့ စိတ်ဓာတ်ကျနေတဲ့ လူထုကို မြှင့်တင်လိုက်တာ ဖြစ်ပါတယ်။ အန်အယ်ဒီဟာ ပယောဂစကားနဲ့ပြောရရင်တော့ အတွင်းရန် နိုင်ငံရေးပယောဂကို ကုလိုက်တာ ဖြစ်ပါတယ်။ အတွင်းပယောဂကြီးဖြစ်တဲ့ ဒေါက်တာသန်းငြိမ်းတို့၊ ဦးခင်မောင်ဆွေတို့ကို ကွာထွက်သွားအောင် ကုသလိုက်တာ ဖြစ်ပါတယ်။ နောက်ဆက်လက်ပြီးတော့ ပါတီတွင်း ပယောဂပအသေးလေးတွေဖြစ်တဲ့ ကြွားဝါချင်တာတွေ၊ အလုပ်ထက် နေရာကို လုနေတာတွေ၊ အထက်နဲ့ အောက်ခြေပြတ်တောက်နေတာတွေကိုလည်း ကုစားရမှာ ဖြစ်ပါတယ်။

ပယောဂကုတယ်ဆိုတာက ၀ိဉာဉ်နဲ့ ခန္တာကိုယ်က ခွာပြီးတော့ ကုကြရတယ်မဟုတ်လား။ ၀ိဉာဉ်တွေက ခန္ဓာကိုယ်ကြီးဆီက ခွာလိုက်တာ ကြာသွားရင် ပြန့်ထွက်သွားပြီးတော့ စုစည်းလို့ မရတော့ဘဲ နေသွားလိမ့်မယ်။ အခုချိန်မှာ ဦးတင်ဦးတို့၊ ဦးဝင်းတင်တို့ စတဲ့ ပါတီဌာနချုပ်က ခေါင်းဆောင်တွေက အနယ်နယ်က အင်အားတွေကို ပြန်လည် စုစည်းကြရမယ်။ ဥပမာ ခေါင်းကြီးပဲ ရှိနေပြီးတော့ ခြေတွေ လက်တွေ မရှိဘဲနဲ့ ဘယ်လိုမျိုး အလုပ်တွေ ဆက်လုပ်ကြမှာလဲ။

အခုအချိန်မှာ ကျနော် အကြိုက်ဆုံး အလေးစားဆုံးသူတဦးကို ပြပါဆိုရင်တော့ မကွေးတိုင်း၊ ရေနံချောင်းမြို့က ဒေါ်ခင်စောဋ္ဌေးဆိုတဲ့ အမျိုးသမီးကြီးပဲ ဖြစ်ပါတယ်။ သူလုပ်တဲ့လုပ်ရပ်နဲ့ အသံလွှင့်ဌာနတွေမှာ ပြောဆိုနေတဲ့ စကားတွေ၊ လေသံတွေကို သိပ်လေးစားမိပါတယ်။ အဲသည်လိုမျိုး အများကြီး ဖော်ထုတ်သင့်ပါတယ်။

ကဲ … ဒီလောက်ပြောလိုက်ရရင် အားလုံး သဘောပေါက်ကြလိမ့်မယ် ထင်ပါတယ်။ အခုတော့ ရေတွင်း ရေကန်တူးတာတွေ၊ လွန်ဆွဲတာတွေ၊ ပရိတ်ရွတ် တရားနာကြတာတွေ၊ ရေလှူတာတွေ ဆက်လုပ်လိုက်ဦးမယ်”

ပဲခူးမြို့က လမ်းပြကြယ်အဖွဲ့က ရှေ့နေကြီး ဦးအေးမြင့်နဲ့ တွေ့ဆုံမေးမြန်းသမျှ ဖြစ်ပါတယ်။